Chersiterliäd

Wo läbsch de hitt nu richtig frii? In Chersitä am See so friedlich schtillä.

Da chaisch dui glicklich ganz dä heimä sii, diis Härz mid Chraft und Sunnä fillä.


Im Schattä vo dä Chriäsibäim hends scho vor alltä Ziitä gläbt und glached.

Hend Glick und Liäbi gha wiä Friäligstraim und sind bim Morgärot erwached.


Bescheidä um das täglich Brot hend sie sich gwehrt als Fischer und als Buirä.

Mit Gottvertruiwä tapfer i der Not sinds zämä gschtandä wiäni Muirä.


Diä himmlisch Muetter isch sogar hiä einisch i der Lindebluescht erschienä.

Sie luegt zu ihrnä Chindä wunderbar, und bliibt fir eister hiä bi ihnä.


Drum zwischä Himmu, Bärg und See wend miär dä schtilli Gottesfriede bhautä.

Ä sonä Heimat gids kei zweiti meh, miär wend si trii und frii verwautä.



Text: Kaplan Paul Kathriner